PRESENTADA
S' ant fatu crei, po tempus meda, ca chistionat in sardu chini non cumandat, chini contat pagu cosa: custu sussediat giai candu, prenus de timoria, incumentzàiaus a andari a s' Asillu e sa mongia si chistionat in italianu e, agoa sa maista in sa Scola Elementari sighiat a si fueddari totu in italianu e sussediat puru, e sussedit oi in di, chi, in sa Scola Media, is professoris " prus bonus"; poniant e ponint, po favoressi sa lingua italiana, una tacia a chini nei ddi fuit calincunu fueddu in sardu.
S' ant imparau, de candu fiaus pitieddeddus a si ndi parriri bregungia de nosu e totu, de sa pagu cosa chi podiaus essiri in su mundu de sa scola anca si fueddat feti italianu e po cussu unu mundu po nosu nou e allenu.
Su andari a i-scola po sa primu borta, giai de sei un' ora dilicada e seria po donnia pipiu, fut po is chi chistionant in sardu, ancora prus legia.
Chi, senza de bolliri chistionai e i-scriviti in buidu, seus de acordiu cun Mario Lodi candu chistionat de su pesu de sa "violentzia", po nai de s' obrigu, chi intendit donnia pipiu candu intrat a i-scola, a s' abituai a cosas noas, non podeus fai biri ca non faint dannu a sa personalidai sua, is maistus chi non funt capassus de aculliri e de ascurtai.
Non si podit imparai nudda a is atrus, chi no eus cumprendiu e non seus sigurus ca in custu, tocat a pentzai e a arrispetai su modu naturali de imparai de donnia pipiu sentza de istacus e interrutzionis. Pentzendu a sa chistioni de sa lingua in Sardinnia e a s' importantzia chi tenit in sa scola po lompiri a fari imparai beni totu a is piciocheddus, bieus ca agoa de is bregungias de su fascismu chi boliat ridusiri a totus ugualis, cunfromas a cumenti boliat issu, mancu fessaus fatus de axridda, fintzas e sa scola de sa repubrica nd' at tirau a is sardus su deretu de si podiri esprimiri cun fueddus, sonus e sinnus chi funt cosas insoru e chi ddus faint essiri e pentzai aici.
In custa scola non si podiat chistionai né de naturalesa né de continuidai puita ca sa prima mancantzia, e mancantzia manna meda, est ca non beniat atzetau su "sardu", sa lingua chi is pipius chistionant in donnia atru logu foras de i-scola. Pipius normalis, abristus, in i-scola s' atrudiant e non musciant on de chi no', po contras, nci dd' acabant a essiri prepotentis e sfacius e, in donnia modu, is unus e is atrus obrigaus a fari de mancu de su sciri de sa scola po morì ca non teniant is strumentus de sa lingua italiana. A sa selezioni scolastica fintzas a su '60 iat pigau parti fintzas e su fari diferentis is piciocheddus a segundu chi sciiant fueddari s' italianu. Ancora oi in di, sa chistioni de sa lingua non benit pigada cun seriedài candu s' arrexonat de is modus de imparai.
A pustis, de candu totus ant cumentzau a i- studiai, de candu s' obrigu de andari a i- scola est lompiu fintzas a 14 annus, su numeru de is piciocheddus chi andant, donnia dia, a i- scola est cresciu meda e cun tellevisioni e giornallis est intrada in donnia domu, fintzas e sa lingua Italiana. Totu custu e atras cosas puru, cumenti de is cambiamentus in sa produtzioni, ant pigau parti a su fari contari sempri prus pagu sa lingua sarda, chi at sighiu a no essiri pigada in contu perunu de sa scola, e a bellu a bellu pagu umperada fintzas e in is famillias chi, a manu a manu, sempri de prus, imparant a is fillus s' italianu, mancai amesturau a su sardu ma, segundu issas, sempri prus bonu po nci arrennesciri a imparai beni in i-scola, invecias de su sardu chi connosciant e sciiant fueddari beni.
S' amesturai su sardu cun s' italianu, siat in is fueddus che in is arregullas sintaticas e foneticas e su no i-sciri fueddai e cumprendiri beni né s' unu né s' atru, fait nasciri dificurtadi in s' ora de imparai e, in donnia modu, indullit, massimamenti pipius e piciocus de famillias poboras e pagu istruias, a tirai mali cun sa scola, cumenti faint biri is statisticas a pitzus de sa seletzioni scolastica.
Custu malistari non podit essiri cumprendiu chi non ddu cuntzìderaus impari cun atrus fatus. Non nci at studius, in sa sotziedai sarda, chi nerint cantu ballat sa lingua, candu seus pitieddeddus, po s' intendiri sigurus, po podiri tirai beni cun totu su chi portaus a ingiriu : genti, logus, animalis, e po cresciri mellus.
Seus de acordiu, in donnia modu, cun su chi narat Bachisiu Bandinu, ca "su modu de chistionai in sardu e in italianu est sempri prus poburu. Is duas lingua non s' atobiant po fari prus arrica s' una e s' atra, ma po ponniri impari is cosas peus de s' una e de s' atra. Sa scola, fintzas a oi, no at mai bofiu ponniri impari is duas linguas po ddas cunfrontari e i-studiai ; oi cicat de fari custu treballu, ma sentza de essiri, ch' incapas, preparada a ddu fari".
Su cumenti i-studiai sa lingua e su dda studiai cumenti ant fatu is pipius de Gergei e is maistus Liliana Zucca e Antiogu Ghiani, est unu modu chi podit essiri sighiu e chi est s' arresurtau de su sciri, in su seriu, innui, cun chini e puita si fait scola, aciuntu a sa capassidai de fari scola e a su connosciri e i-sciri umperai is modus e is tecnicas de sa lingua e po cussu cicai de dda connosci e de dda studiai sempri mellus. Su treballu at tentu po mannus e po pitius significau mannu.
Scoberri e torrai a i-scoberri sa lingua sarda in sa struttura sua e in su chi de prus profundu issa bolit nai, est stetiu po is pipius de Gergei oras de treballu alligru, praxili e chi ddis at donau soddisfatzioni, treballu fatu cun modus ativus e naturalis. Bastat a ligiri su chi ant scritu po ndi podiri cumprendiri s' arresurtau : ma su prexu chi ant tentu candu ant discutiu is chistionis de sa gramatica, o cumenti scriri is fueddus, est stetiu cosa de i-spantu, chi ddu poneus cun s' arroscentzia chi acumpangiat giai sempri is i-studius de i-custa casta.
De siguru perou, sentza de s' apogiu de is babus e de is mamas, custa esperientzia non iat ai fatu a dda fari ; no est po torracontu o po arrispetu chi naraus e torraus a narriri ca s' apogiu e s' intelligentzia insoru est stetia giai fundamentu de su treballu. Ma seus deaderus cumbintus ca feti candu babus e mamas e sa famillia ant ai cumprendiu s' importantzia chi tenit s' imparai su sardu ( po is pipius sardus ) po "cresciri" fintzas e in sa sotziedai, sa chistioni de sa lingua at a podiri essiri pigada e incaminada facias a su giustu.
Su modu de castiai sa chistioni de is linguas ( mannas o pitias chi siant, fueddadas de meda o de pagu genti ) est cussu de dda studiai impari, totu su mundu, in modu chi, arrispetendi is diferentzias, puntu de arribu siat sa possibilidai chi sa genti de calecasiat logu e is pressonis potzant comunigari e s' acostiari po ndi tenniri, in su sciri, beni e arrichesa.
Aici cumenti est oi, sa cosa no est de pagu contu : medas no ant ancora cumprendiu, né is chi faint politica e né in sa sotziedai, ca su problema de sa lingua est cosa seria meda.
Po cussu sa scola sarda no est, e non feti po crupa de chini ddui treballat, a s' artesa de is problemas chi sa chistioni sotziulinguistica ponit, né, a sola, iat a podiri fai cambiari is cosas.
S' art. 5 de su statutu regionali est cumenti de chi non siat stetiu scritu, sinnali ca pagu cosa est, po is politicus, sa chistioni de sa lingua e s' importantzia chi custa tenit po su caminu de sa sotziedai in su beni stari e, pagu cosa est su fatu ca una scola chi obrigat a chistionai feti una lingua, fait arroris in is prus disgratziaus e tanti.
Oi in di si sighit a chistionai de "bilinguismu" e de fai imparai in is i-scolas umperendu sa lingua sarda, a pustis de nd' ari discutiu po medas annus de mala gana e amostendu ca pagu connoscentzia si tenit de sa chistioni.
In s' interis, in atrus logus, in Italia e in Europa, ant fatu passus mannus arreconnoscendi sa lingua insoru e donendiddi s' importantzia chi ddi dexit ; nosu, po contras sugheus a tenniri leis chi non funt a s' artesa, faendi cumprendiri aici ca seus is primus a essiri contras de nosu e totu, cumenti de pressonas e cumenti de populu. Faeus de mancu infatis de s' arrichesa in su sciri, in s' arrexonari, in s' imparai, in is sentimentus, arrichesa chi si donat su sciri fueddai duas linguas : e puru, is studiosus ant postu in craru ca s' intelligentzia ponit in proi su connosciri duas linguas a pipius pitius.
Umperai e i-studiai duas linguas, una de is duas su sardu, chi si babus e is mamas iant a depiri sighiri a imparai a is fillus, iat a essiri de siguru unu donai sa possibilidai, a is pipius, de amanniai in s' intelligentzia.
Po essiri coerentis, a pustis, iaus a depiri agatai arrispostas a unas cantu pregontas chi arriguardant su tempus nostu passau, su tempus nostu de oi e su tempus nostu chi at a benniri.
De innui ndi beneus, chini seus oi e facias a innui seus andendi ?
In cust' isula indromiscada, obrigaus de tellevisioni, arradiu e giornallis, a essiri totus ugualis, parit ca s' est perdiu fintzas e su tempus e sa memoria. Est proibiu a s' arregodai is fueddus de unu mundu tropu antigu chi non tenit nudda ita biri e ita fari cun su mundu de oi.
Non chi no i-scipiaus ca su modu de treballai ( in sa messaritzia, in sa pastoritzia e in is artis ) est cambiau po morì de is machinarius, ma de siguru, sa terra nosta, no at a podiri essiri mai logu de industria manna. Sa pastoritzia est sempri s' atividai de s' imprus de is sardus, po contras est treballosu a sighiri a lassai obertas is industrieddas : sendu chi is cosas funt aici tocat a si pregontai cumenti depeus pentzari a su cras e chi si potzat cosiri su scorriu fatu de su ari cretiu, e meda, a s' industria petrolchimica, fintzas e chi si ndi seus scidaus a lestru de su sonnu.
E non podeus crei nemancu a is chistionis de logus beni chistius e castiaus, o a is chistionis de torrai a su chi fiant is logus chi produsiant cumenti de Monteponi, Funtana Arraminosa, o a is chistionis de fari butegas po imparai is artis, chi, cumenti de locheddus, nci seus perdendi s' arrichesa manna nosta, chi est fata de su modu nostu de essiri, de intendiri, de cumprendiri, chi nci seus perdendi sa lingua nosta e totu.
Cumenti chistiri beni custa arrichesa feti nosta, ponendusi contras a sa magini de unu populu amostau a is i-strangius in s' istai, cumenti de capassu feti de fai biri is costumus e is ballus de una borta? Cumenti podeus contari sa storia nosta a nosu e totu e a is atrus chi non umperendu cun dinnidai sa lingua nosta, sa prus chi andat mellus po contari sa storia nosta, sa musica nosta, is cantus, is sentimentus nostus, su modu de treballai nostu ?
Seus nosu chi depeus agatari su modu po no essiri obrigaus a essiri ugualis a is atrus, po non perdiri su modu nostu de essiri, s' anima e su coru, po morì de is i-strangius chi, in donnia modu, cumentzant a pediri cosas diferentis e de calidai. Ita teneus de narriri nosu, a su mundu e cumenti ddu podeus narri ? A i-custas cosas at a depiri arrespundi fintzas e sa scola, ma a sola no dd' at a podiri fari.
Su treballu fatu in Gergei est feti unu modu de fari, ch' incapas nci nd' at atrus, ma non ddus connosceus, spereus chi atrus si nd' ant a fari. Pentzaus perou, ca is sparimentus non bastant: nci bolint fintzas e leis bonas e chi castint aillargu, capassas de pentzari a su cras sentza de ponniri a parti e de nci scavulari s' ariseru, chi scipiant cun coragiu frimari s' andatzu de si nci getari sa funi a su tzugu e chi ponit sa terra nosta a sa coa de sa filera de sa scientzia e de su sciri produsiri.
Mariella Marras
