IS ISPOSUS DE HOC' ANNU
TIS ISPOSUS DE HOC’ANNU
Custus’isposus chi hoi coronant su disigiu cos’ insòru celebrendi anant’ e Deus e de sa Cummunidadi manna e bella de cust’ alma cittadina de Cerascius “su sacramentu de s’ amori”, funti – si podit nai – “fillus de custu ritu antigu”: su sposu: Efis – e duncas – arresuttat fillu de is primus isposus chi hanti celebrau s’antigu sposaliziu cerascinu – pensai! – in su 1962: Albinu e Ida. Sa sposa Simona è “filla de arti” poitta su babbu – Faustinu – est dirigenti in sa Pro Loco, beni tessia e guvernada de su presidenti Giuanni Frau, de giài 20 annus a custa patti.
Fàinti “corona” a Efis e a Simona una coppia de isposus de sa republica slovacca : Mariàn e Kvetoslava, chi arriccéus cun tottu su coru e affestaus meda meda, impari cun is isposus nostus.
Candu in Italia, sa Cunferentzia Episcopali Italiana (C.E.I.) hiat pensau de rendi su ritu de su sacramentu de su matrimoniu prus sèmplici, ma prus sinzillu, prus craru e fruttuosu po tottus, in su mes’ e donnia santu de su 2004, ritu de su restu semipiri frimmu a su 1990, chini de bosatrus tenidi bona memoria, certamènti arregórdada beni ca dèu hia domandàu un aggùdisceddu..., po fai unu pitticcu aggiornamentu – nosu puru – in custu ritu antigu, candu si faidi sa manifestazionì de su cunsentimentu – in s’antiga coja cerascina – cunsentimèntu chi criada veramenti su matrimoniu! – "Io..., N..., accolgo te come mia/mio sposa/ sposo..., ma – a is horas- nisciunu mai m’ hat cunzuttàu po ma’aggiudài. E custu no ándat beni!?
Tottus si frimanta nendimi: - “Dèu arricciu a tui", oppuru – Dèu pigu u tui”, o Dèu accudu a tui, o attrus fueddus chi in cust’ altari est melus a nemancu pensai e duncas a no pronunziai mai.
In beridadi però nos’ atterus seus furtunàus ca in su 1970, sa bon’ anima de su cardinali Srebestiànu Baggio, arz’ obispu in Casteddu, - hoi in grória siada – trintascinc’ annus fàidi hiad’ approvàu, a bósci, sa formula giusta de custu ritu antigu - tradùsiu e preparàu de su poeta cerascinu Faustinu Onnis - chi po cunvenienzia e praticidàdi in custas paginis chi sighinti si ripòrtada de nòu po ddu fai conosci a tottu bosàttrus, in modu de podi partecipài puru mellus a su sposòriu di Efis i de Simona.
