TOTTUS FESTANTIS, TORRAUS A CRESIA MANNA !
TOTTUS FESTANTIS, TORRÀUS A CRESIA MANNA!
In custu mundu, tanti bortas med' attentu a s'esterioridadi – cument' e nai a su "look" o mellu nai ancora a sa "bona presentada" – prus che a s'internu de is persònis e de is cosas, is Amministrazionis cumunalis, cun is Sindigus in capu, a bortas, fainti prus bella sa "zittadi terrena" cos' insòru.
Hoi, propriu po cussu, tottus festantis, séus torraus - cun is sonus de beranu - a Cresia Manna, finzas' e poitta su Munzinniòri nostu Giuseppi Mani, apustis de hai fattu "sa carèsima de Nosta Sennora", su quindisci de mes' austu, in sa Cattredali de Casteddu e puru innòi hat celebrau s' arrésuscídu" e sa gròria de Nosta Sennor' e s' Assunta, accant' e Deus cun s'anima e su corpus sùusu "ver' ancòni e istéddu luscènti" po tottus nosu e specialmenti po realizzai tottu sa salvazioni de s'anima cosa nosta. De aundi beneus, aundi andàus? Seus in custu mundu de passaggiu, totus derettus a s' ateru regnu e dognunu si pighit s' impegnu po affrontai su urtimù viaggiu.
S' annu passàu custu ritu de s'antigu sposaliziu ceràscinu est' istettìu celebrau in sa parrocchia de su SS.mu Srabadòri: tottu bellu!, ma sa "cresiedda" no est' istettia capàssa de podi fai partecipai tottu sa bona genti chi in custas occasionis si presentat meda numerosa. Arregordu de hai nau a don Dariu Falchetti, responsabili orioninu in cussa parrocchia: "a si biri a s'annu chì ènidi!", sigurus ch'is traballus accant' e sa Cresia Manna hiant' a durai ancora un' eternidadi!?
E invércis no! Gratias a su Sindigu su dottori Mariu Sau, a s' Amministrazioni cumunali...; e a is maistus operàius e picch' e pardéris e inginnieris..., e a is pregadorias de don Ireneu Schirru parrucu - pro tempore - hoi in cresia Manna, unias a cussas implorantis de sa Pro Loco cerascina e de tottu custa bella e bona genti chi immoi saludu cun sa stima e s'affettuosidadi de sempiri.
In custa festa nodìa mancad' occànnus Fedora Putzu; su Sinniori dda ricumpènsidi po cantu hat fattu in sa e po sa Pro Loco, po rendi risplendenti e no iscètti di oru dogna iniziativa de cust' Associazioni culturali, su Signori Deus tottu poderosu ddi oberrat sa porta de su paradisu e s'indi strantascìdi po dda serbiri in sa mesa de sa "Pro Loco" celesti: hoi puru Fedora de sigùru, si cástiada de su scelù e po cussu dd' intendèus accanta accanta de tottus nòsu!
No mi pozzu permitti o iiscàresci de saludai a tottu sa Cummunidadi de Cerascius, a is autoridadis civilis e militaris, a tottu is sindigus e cunzilleris de dogna rangu chi òperanta po su beni de tottu sa popolazioni, a sa Pro Loco cerascina, senz' e iscàresci is parruchus e sacerdotis - vicarius de is attras quàtturu parrocchias chi funtì presentis' in su territoriu de su Comunu de Ceràscius, tresi accant' e pari e i s'attra prus attesu giai in Casteddu, in Su Planu.
