PREGADORIA EUCARISTICA II
PREGADORIA EUCARISTICA II
Predi: Su Sinniori siat cun bosàturus
Pòpulu: Et cun tui puru
Pr.: In atu su coru nostu
Pop.: Dhus teneus postus in Deus feti
Pr.: Arringratzieus a Deus, Sinniori nostu
Pop.: Est cosa bona e giusta su dhu fai.
PREFATZIU:
Est propiu doveri nostu e cumentzu de salvatzioni eterna su T’arringratziài sèmpiri e in donnia logu, Deus nostu, in Gesùs Cristu, Fillu túu stimau.
Est Issu su Fuedhu biu chi hat donau cumentzu a totus is cosas chi s’agatant in su mundu e i si ndi dh’has inviau po’ si salvai e po’ si liberai, s’est fattu unu de nosu cun s’interventu de su Spiritu Santu i est nàsciu de sa Vèrgini Maria.
Po’ potai a cumprimentu sa voluntadi túa e po’ ti presentai unu pòpulu santu hat istèndiu is bratzus in sa gruxi. Cun sa moti sua hat distrugìu sa nosta e hat donau a su mundu sa scera de sa resurretzioni. Est po’ s’alirghìa chi si donat custu misteriu de salvatzioni chi nosu, impari cun is àngiulus e is santus, cantaus sa gloria túa:
Santu, Santu, Santu est su Sinniori de totu su mundu. Is celus e sa terra lùxinti de sa gloria túa, Hosanna in is celus prus àtus. Beneditu est su chi benit a nosu in nòmini de su Sinniori. Hosanna in is celus prus àtus.
CP: Tui ses santu in totu, Deus Babbu nostu, e ses principiu de totu su chi est santu in su mundu, santifica custus donus cun su Spiritu tuu po’ chi si furrint in Gesùs Cristu, Sinniori nostu.
Issu, afrontendi liberamenti sa passioni, hiat pigàu su pani in manus, dh’hiat pratziu e donau a is discipulus narendi:
PIGAI E PAPAINDI TOTUS, CUSTU SEU DEU CHI MI SEU SACRIFICAU PO’ BOSÀTURUS.
Apustis cena hiat fattu su propiu cun su bocali de su binu, arringratziau chi hiat a Deus, dh’hiat passau a is discipulus narendidihis:
PIGAI E BUFAINDI TOTUS CA CUSTU EST SU BOCALI DE SU SANGUNI MIU PO S’ALLIANTZA NOA I ETERNA, DERRAMAU PO BOSÀTURUS E PO TOTUS PO SU PERDONU DE IS PECAUS. FÈIDHU SÈMPIR IN MEMORIA MIA.
Predi: Custu est misteriu de sa fidi nostra!
1. Pòpulu: Celebrendidhu, donaus sa scera de sa moti tua, naraus e creèus ca ses risuscitau e abetaus sa torrada tua a sa fini de is tempus!
2. Donnia borta chi papaus de custu pani e bufaus de custu càlixi donaus sa scera de sa moti tua, e abetaus sa torrada tua a sa fini de is tempus.
3. Tui s’has liberau cun sa Gruxi e sa Resurrextzioni tua, salvasi, Srabadòri de su mundu!!
CC: Arregodendi e celebrendi sa moti e resurretzioni de Gesùs Cristu, nosu ti presentaus, Deus, su pani chi si donat vida e su càlixi chi si salvat e t’arringratziaus poita ca s’arricis po’ ti presentai custu sacrifìtziu
Ti pregaus con umilidadi: po’ essi in cumunioni cun Gesùs Cristu cuncedisi chi su Spiritu Santu fatzat de nosu una familia in paxi cun tui e tra nosu.
Arregodati, Babbu nostu de is celus, de totus is cristianus chi fôrmanta sa Cresia in custa terra: fai chi siat perfeta po' s'amori tra issus, con su Papa nostu Benedittu (XVI) su de sésci, s'Obispu nostu Giuseppi (Mani), is predis, is catechistas e de totu s'umanidadi chi cicat de ti connosci sinceramenti in custu mundu.
Arregodati de is fradis nostus chi si funti dromius po' sèmpiri cun su coru prenu de sperantza de podi torrai a bivi trasformàus in sa resurretzioni. Perdona is pecaus chi hanti cumitiu po' mori de sa debilidadi umana e faidhus brintai anant'e tui e chi in sa gloria tua sianta po' sèmpiri.
Teni misericordia de nosu puru: amitisi a sa vida chi no acabat impari cun sa Vèrgini Maria, mama de Deus, cun is Apòstulus e totus is Santus chi ti funt istetius sèmpiri agradèssius: e chi, in Gesùs Cristu, Fillu tuu, canteus po' sèmpiri sa gloria tua:
In Gesùs Cristu, cun Issu e in Issu, a tui, Deus e a su Spiritu Santu, donnia onori e gloria po is sèculus de is sèculus. Amen.
