Su corpi umanu
PARAULAS ISMENTIGADAS
Oe bidimus su corpus nostru a sa parte de nanti pro nos ammentare cuddas paraulas chi si sun perdende. Una de custas est “maragna” o, mezus, “sas maragnas” chi sun sas partes de sa conca subra a sas orijas.
In su nasu, in pius de sas tivas, in mesu b’amus sa pinna chi las partit e sas nàstulas chi las serran a ambas partes.
A sa parte de sa bucca li naramus murru e mutzighile. Dae custas paraulas ndi benin su modu de narrere “murru pistu” e sa paraula “immutzighilada”. Sutta a sa bucca, sas barras forman su baéddu chi est una paraula gadduresa. De su tuju e de sos coddos nd’amus già faeddadu sa chida passada.
Sa parte de subra de sos bratzos si narat “ùmaru”. Sa parte de intro si sarat suircu. Falende in su bratzu agattamus su cùidu e sa giuntura de su cùidu chi ligat s’ossu de su bratzu cun sos ossos de su cuidale. Su bratzu cumprit in su bultzu chi lu giunghet a sa manu cun paritzos ossigheddos. Sa parte de intro de sa manu si narat “pramma de sa manu” e si cumpartit cun chimbe pòddighes o didos. Dognunu de custos pòddighes giughet tre ossigheddos cun sas giunturas chi si naran nujas.
Su pettus si cumpartit in duas pettorras a inue abbojan sas costas chi forman sos costados o sos costazos. In mesu subra a sa matta b’amus s’imbìligu. A ambos lados b’amus sos lumbos e sas carrucas. De custas duas paraulas nos nd’ammentamus massimu cando semus illumbados o iscarrucados.
Inue cumprit sa matta b’amus sas ìmbenas chi forman duas perras o pèrrias. Dae custas partin sas duas ancas chi a parte de subra si naran coscias. Sa giuntura inue abbojan sas coscias cun s’anca si narat binuju e s’ossigheddu tundu chi nos permittit de mujare sas ancas si narat giogulana.
Sas ancas cumprin cun su cambutzu inue b’est s’ossu de su rajosu chi si narat gai ca dolet meda cando leamus calchi colpu o iscolzadura.
Su corpus cumprit cun sos pes chi giughen issos puru chimbe pòddighes comente sas manos.
MM
