AMIGU VIRTUOSU
Canzone
1-
Donniunu onorat su propriu destinu
Chi mamma natura a totus at donau
De beni e de mali fattu est su caminu
E oi pensu a chini pagu fortunau
Chi tanti at lottau- contr' a sa sfortuna
Oi in sa tribuna- di arti e di amori
Tramudat dolori- in gratzia de gosu
Amigu virtuosu- meritu 'e cantai.
2-
Meritu de cantai
Fattusu de contai
Tengu in sa memoria
Amigu de talentu
Coraggiu tui as tentu
T'at donau sa gloria
Su sartidu 'e vittoria
T'at postuin sa storia
Sa bidda as onorau
Amigu de talentu
Coraggiu tui as tentu
Sa gloria t'at donau
De giovunu animau
Su sport as praticau
De sa pitica edadi
Amigu de talentu
Coraggiu tui as tentu
Sa gloria donau t'adi
Tui godis s'amistadi
Genti 'e donnia edadi
De totus amirau.
3-
Tui godis s'amistadi
De genti 'e donnia edadi
Po geniu e sabiesa.
Tesoru sepultau
In vida riportau
Poesia quartuccesa
Ca scritta cun puresa
De bidda una ricchesa
A luxi mai bessia
Tesoru sepultau
In vida riportau
Quartuccesa poesia
De Olata fantasia
De poetas arricchia
a vista mai posta
Tesoru sepultau
In vida riportau
Poesia 'e bidda nosta
In is garas proposta
E de tui disposta
Po sempri dda premiai.
4-
In is garas proposta
E de tui disposta
Segnu de mannu coru
Su bellu nostu cantu
De Campidanu vantu
Bandat in Logudoru
Portendusi` decoru
Tentu che unu tesoru
Sa bidda onorendi
Su bellu nostu cantu
De Campidanu vantu
In Sardigna bandendi
In donnia premiu intrendi
Casi sempri pighendu
Giustu e bonu votu.
Su bellu nostu cantu
De Campidanu vantu
In sa Sardigna totu
De totus ses connotu
In sa bell' arti dotu
Dignu di essi premiau.
5-
Dignu 'e ti premiai po arti e deditzioni
Oi ti saludu giustu ' e primu manu
A tui e' donada donni' amiratzioni
In su sardu cantu ses tui soberanu
Cust' impegnu umanu- portu in presentzia
Tenni conoscentzia- di arti, pena e gloria
At essi sa storia- a 'ndi fai ammentu
Dogna cumplimentu- essi appretziau.
Camillo Corona
