Scena de sa RESURRETZIONI de GESUS CRISTU
Dus sacerdotus sodisfatus, e in dubiu
1°SACERDOTE - (prexau)
Bellu menjanu de Pasca. Epur' e puru si nd' emus allixerai.
2° SACERDOTE -( prexau)
Mortu. - Mortu, imoi.- ( malu) . Mortu e fuliau, cun is pecadoris impurus aburrescius de su Celu. E impari cun cussus porcus si nd' at a i- scidai, in sinu de su babu, belzebubu.
1° SACERDOTE- ( sodisfatzioni malinnia)
Tudau, esti. E tudau abarrat. Pastura po su bremi. Cumenti tocat a totus.
2° SACERDOTE - (sfutendi ma unu pagu a brulla, ca funti prexaus)
A bosatrus sadduceus, chi no creeis in sa resurretzioni, s' at a tocai aici : in d' unu nudda po sempri.
1° SACERDOTE - ( ironia)
Bosatrus fariseus, limpius e justus
, abetais sa groria in celu.
- Ma a s' acabada ita nd' eis a tenni ? Sa vanagroria ca sa gentixedda si tenit po justus. Po santus. ( tra sfutimentu e brulla) Po cussu gei si nc' at tocau : " Sepulcrus imbarkinaus, limpius in foras e prenus aintru de pudescori".
2° SACERDOTE
E imoi ddu est issu, in pudriori. - Su ki no andat a bosatrus, fiat ca su " profeta" tirat po sa gentixedda.
1° SACERDOTE
Sa gentixedda ki apenas dd' at biu acapiau est isparessia.
2° SACERDOTE
Sparessia imoi, cumente ki cussu no siat mai nasciu. " Fertu su pastori : spartinadas is brebeis".
1° SACERDOTE
Ita si creiat custa basca preba ? Ca ddus faiat meris de sa terra ? Ca ddus scabulliat de is romanus ?
2° SACERDOTE- ( buskendiddu in contradizioni)
E bosatrus, ki cun is romanus, si seis acrobaus ?
1° SACERDOTE - ( cirkendi de straviai)
E be ... si fessit stetiu veru Messia ... Messia gherreri de ndi torrai su renniu de Israeli ... -
Ma custu !.? S' est postu contras a totus ..
- E aici, ( ponendiddu manu in coddu) nosu ca no cuncordaus, seus acostaus.apapri, po ndi dd' ogai de su mundu.
2° SACERDOTE
E crasi, scaresciu custu Galileu, torraus a is disputas nostras.
1° SACERDOTE
Ma oi, faeus festa impari. Andeus ( funt andendi)
UNU - ( atrupellau)
Sumu sacerdoti !
1° SACERDOTE
Ita ...?
UNU
Dd' anti postu in d - unu sepulcru.
1° SACERDOTE
A su Galileu ?
UNU
A su Galileu. In su sepulcru nou de Jusepi de Arimatea.
2° SACERDOTE
Contras a sa traditzioni. Contras a is leis. Unu cundennau adat ghetau in fossa. Paris cun totu is atrus.
UNU
Pilatus, si ddus at cuncedius. A Jusepi, a Nicodemu ...
2° SACERDOTE
Est bussinada po nosu, custa. Cussu romanu si bolit propriu apetigai.
1° SACERDOTE
Tocat ki andeus a si kescai. ( preocupau) Ma custu Pilatus ...est tostorrudu, si una cosa dda fait no dda cambiat po nosu. No ddu podemus cumbinci, a ddu cundennai, custu Nazarenu ...
2° SACERDOTE
C' at timiu, dd' at cundennau, ( arriendinci) Candu dd' esu nau : " si fait nai rei de is judeus "
1° SACERDOTE
Dd' est praxiu cand' eus nau : " No teneus atru rei ke Cesuru"
2° SACERDOTE
Cussu esti stetiu tropu. Bosatrus sadduceus, tropu, s' incalais a Roma.
1° SACERDOTE
E aici ci seus arrennescius.( indinniau) Perou, imoi, onorau in d- unu sepulcru ...!
2° SACERDOTE
E custu Arimateu ...
1° SACERDOTE
No funti totus sparessius, is discipulus sus.
( pensendii) Arimateu ...Nicodemu ...No est totu cosa de gentixedda. Sa gentixedda fuia ...e intranta canis mannus. Poita ?
2° SACERDOTE
Poita ?
1° SACERDOTE
Poita ? Poita ca ddu creinti ?
2° SACERDOTE
Kini, ddu podit crei? Po cumenti dd' at acabada ...
1° SACERDOTE
Acabada, iat a depi essiri. Perou, it' iat nau, cussu ' mpostori ?
2° SACERDOTE
Tantis nd' at nau. Tropus. ( sodisfatu) Ma imoi, at acabau.
1° SACERDOTE
Nou ! No iat nau ca a is tres dis iadessir arresuscitau?
2° SACERDOTE- ( ca no nci creit)
Arresuscitai ! E ddu narais bosatrus saduceus ca no creeis mancu a sa resurrezioni in s' urtima dì.
1° SACERDOTE
Deu gei no nci creu. Ma gei dd' at nau. Andeus ! Curreus aund' est Pilatus ! Ca sa cosa est grai. Innoi nd' arruit totu su mundu nostru.
2° SACERDOTE
Eeh ! Ita timis ?
1° SACERDOTE
Bosatrus sperrais donnia perr"e fueddu, disputais po donnia puntixeddu de sa lei ... e no bis su ki nci podit nasci. Poita dd' eus bofiu mortu ?
2° SACERDOTE
Ca s' est presentau po fillu de Deus.
1° SACERDOTE
E poita dd' anti cretiu ?
2° SACERDOTE
Ca anca fait miraculus ...( precisendi) Miraculus po opera de Belzebubu principi de is dimonius .
1° SACERDOTE
Po essiri cretiu profeta ... no serbit a arresuscitai. Ma issu ...de arresuscitai, s' est vantau.
2° SACERDOTE
Tontu, esti stetiu : S' est vantau fillu de Deus : no arresuscitat, e no arresultat mancu profeta. Mancu profeta minori.
1° SACERDOTE
Bis, ca ses cumprendendiddu.
Ki perou arresuscitat, est " fillu de Deus". E ki boganta cussa boxi ... ki fainti cussa trassa.. ...! Curreus aunde Pilatus.
Sarbadori Vargiu
