ASCURTADDU SU ZERRIU INSORU
Ingenugada in s' artadi tuu`
Ti pregu eti pedu grazias :
In custu niu de " pillonis" fertus...
Prantus de dolori
M' iscorriant su coru.
Ascurtaddu su zerriu
De s' innocenti,
Chi mussiat oras de sprama,
Acciottau
De s' omini disabiedau.
Ascurtaddu su zerriu de sa pipia,
Sene sa mama,
Bendia po trinta " soddus"
Che a Tui,
No dda lassis
Appettigai de s' orcu...!
Ascurtaddu su zerriu
De s' omini afrigiu
Sene un' aprigu,
' onaddi unu carinniu
E sa paxi in s' anima.
Intrega su perdonu
A s' omini chi no agatat asseliu
Insullendi gherras cun rancori
Poita no iscit perdonai.
Prufassonis de paraulas
Currint debadas
In lacanas de attesu
Aundi su Deus insoru
Dd' anti cravillau
Sene curpa che a Tui etotu !
Perdas de granitu,
A sa muda
Lambrigant sanguini
De creaturas moddianas...
Troppu gruxis nozentis
Ant prenu
Is campusantus de sa terra !
Ti pregu ...
Ascurtaddu su zerriu insoru !
Ida Patta
