AMIGU
Cun su mari tengiu cunfiantza
C' ascurtat che amigu cuntentu
E sempri prontu a fai 'n manera
De liberai sa menti de su mali.
E sighit gioiosu in sa danza
A sa musica sonada de su bentu
Carignendi s'atza de scogliera
Cun didu delicau de acua e sali.
Is bortas ghe non arrespundit
Funti po su chi hat a contessi
Poita conoscit feti su passau
Tenendisiddu stugiau in su sinu.
Faula cun beridadi non cunfundit
Chistionendi craru chen' e pressi,
In s'unda unu stampu m' hat lassau
Undi fuliu su refud' e su destinu.
Cun passientzia cand' is delusionis
Po su tropu ghetai dd'hant ingrussada
Dda trisinat a fundu ' e s' orizzonti
Isperdendidda in peis de sa luna.
Poi cuncordat unu bolid' e pillonis
Chi joghitendu in s' aria asseliada
A punt' e ala mi frandigant sa fronti
E torrant sa sperantzia in sa fortuna.
Ettore Sanna
