ASCURTAI SU REPICCU ( a Faustino Onnis)
Cantus canzonis a groppas
De su bentu, cantus fueddus
A spainu seminaus :
Berchidus de unu coru
Chene meri arretumbant
In zrivas de Sardigna.
Arretumbant impari
Cun sa boxi de is Sardus
Pellitas de Barbaxa,
Di Ampsicora, Marianu,
E Lionora, de is milli
Forza Paris de su Carsu.
Agatat, Faustinu, s' aggitoriu
Origas allutas po ascurtai.
E bosaterus, giugis e reis,
In Domu de s' Orcu corcaus,
Bosu, chi seis abettendi
De sa spada nuragica
Cinciddas de fogu nou,
Heis a bivir' ancora,
Heis a bivi' po sempiri
De is fueddus appillaus
In lavras a maistas de scola,
In lavras a is pipius de Sardigna.
Ascurtai su repiccu
De centu, de milli trantallius
E fueddai, fradis ! Fueddai
Ch' est sa pasca de is fueddus,
De is fueddus zivilis,
De is fueddus arrimaus
De reis e de giugis.
Su fueddu salvat sa terra :
Si no sigheus a fueddai,
S' aberrit sa zriva :
In ziringoni si furriat
Su populu mudu.
Custu ses beniu a si nai :
Sa revesa prus manna
Sunt is fueddus de iaia !
Franco Pilloni
