SU CHI EST SA VIDA
Sa vida passat che su bentu
Sempri caminendi de continu,
S' omini soddisfau o iscuntentu
Percurridi unu tanti de caminu,
Donu donau de s' Onnipotenti
Trattau beni at Sant' Agostinu.
C' est chini no nascit normalmenti,
Si de sa nascita est istrupiau
Po cresci ddi serbit assistenti.
Po una vida est sacrificau,
Babbu o mamma po unu pipiu
No at a essiri mai ressignau
No lessint cumpriri unu strupiu,
Prima de nasci si bint difetu
Est mellus chi no siat esistiu.
Ci provint e no perdant s' abetu
Chi nasciat fillu forti e sanu
E siat de totu is carris perfetu.
Sa scienza est ponendi manu
E sartau casi at s' ostaculu,
Unu morendi ddu torrant sanu.
No c' est prus Santus cun su baculu
Chi tengant sa potenzia apustis mortu
De ddu torrai a biu po fai miraculu.
Solu Cristu si fiat risortu,
Cun sa potenzia de Deus divinu
Issu fiat miraculus po totu.
Iat trasformau s' acqua in binu,
A su zurpu sa vista iat torrau,
Sanada sa genti in su caminu.
Calincunu adessi provau :
Po no pudai prusu e binnennai
Forzis s' acqua no at colorau.
Cun fidi depeus caminai,
Cussa est sa luxi de caminu,
Sa speranza po s' acumpangiai.
Ignazio Serra
